കുത്തുകൾ യോജിപ്പിക്കുന്നത് പോലെ നിർമിച്ചെടുത്തവയാണ് ചില ഓർമ്മകൾ. എന്റേതാണെന്ന് സംശയമില്ലാതെ കൊണ്ടു നടന്നിട്ടുണ്ട് പലതും. ഓർമിച്ചെടുക്കുന്നതിനേക്കാൾ എളുപ്പം മറക്കാനാണെന്ന് അനുഭവിച്ചറിഞ്ഞതാണ്. ഈ നിമിഷം നിങ്ങളെയും മറന്നേക്കാം. മഴക്കാലത്ത് ഒരു ചിലന്തിവലയിൽ തങ്ങി നിൽക്കുന്ന തുള്ളികൾ പോലെയാണ് ഓർമകൾ. ചിലത് , ചില മനുഷ്യർ പ്രിയപ്പെട്ടതാണെന്ന ബോധ്യം ഉണ്ട്. ചില നേരങ്ങൾ, ചില ചിത്രങ്ങൾ ഒക്കെ അതുപോലെ തങ്ങിനിൽപ്പുണ്ടാവാം. അവനവനെ ഓർക്കുമ്പോൾ പോലും സ്വയം നിർമിച്ചെടുത്തവയാണെന്ന് തോന്നുന്ന കാലം. ശരീരത്തെ കൊല്ലുന്ന പോരാളികൾ ഓർമകളെയും അതുപോലെ തന്നെ കശാപ്പ് ചെയ്യുന്നുണ്ട്. എത്ര കാലം ഇങ്ങനെ എന്നറിയില്ല. അവളവളിലേക്ക് നീണ്ട് നിൽക്കുന്ന ഇരുതല വാൾ മാത്രം.